سلام يا صحبي..
Posted
معرفش ليه أنا دون البشر بيحصل معايا كدة ، ليه الحياة معنداني ومخلية كل حاجة سودا في وشي كل شيء حلو في حياتي فجأة بيقلب لغم وحزن ومصايب سودا ، ليه كل حد يكون جوايا بجد فجأة يروح يختفي يموت ، العيب في مين في أنا ..أنا اللي بنسى الناس اللي بحبهم فجأة فبيموتوا .. زمان كنت فكر اني شخص غريب لما أحب حد يموت أنساه أسقطه من ذاكرتي يقوم يموت ، وكتير بنيت أعتقاد شخصي أني عايش جو كتاب مقفول بشخصياته بناسه بشوارعه بكل حاجة وحشة وحلوة والحياة تلف تنغص زي ما تنغص في الواحد ، وفي الآخر أنسى الناس لفترة مش بمزاجي لكن الدنيا بتلف بينا لوحدها يجري أيه يعني لو وقفت شوية عن اللف بي ، لو حسيت لفترة أني طبيعي زي البشر يجرى أيه للدنيا لو خدت نفسها شوية معايا لية الجحيم ده .. ليه الحياة كلها كدة ، كلمة ليه حتى بقت تقيلة وبايخة .. الناس .. الناس حتى كلمة الناس بقت فاضية عاملة زيي الاسطوانة اللي دايرة والصوت طالع مغشوش ومتعكر ، أني أفرح في يوم وأزعل في ثانية واحدة قمة عبقرية الحياة معايا.. أني أحضن صحبي بشوق وأبص في وشه يقولي تصور ماتت .. لا مش عايز أتصور أنها ماتت .. صعب أتصور أنها ماتت ..
ماتت .. الكلام كله بيبوظ والحروف تقتل نفسها والكون يغمق ويفتح والصورة تبيض وتزرق ، والدنيا تغفلق في وشي .. يعني أيه ماتت .. وليه.. يجيي صوته وهو بيطبطب على دمعتي ماهو إنت كنت نسيتها من زمان ياعم .. مالك ..
مالي أيه وزفتي أيه .. ومين أداك الحق تقول أني نسيتها ولا لأ .. ومين خلاك تقولي أصلا أنها ماتت النهاردة .. يا أخي ما أنت بقالك أكتر من شهرين غايب عن وشي .. ولما حد يسألني أقول مراته لحمت باب الشقة عشان مينزلش .. وأنا بحضنك النهاردة وبقولك كفارة ياعم أخيرا ظهرت مراتك متربسة عليك .. تقوم ببساطة تقولي لأ.. أصلي كنت عيان شوية ونزلت عشان عزاها .. عشان ماتت ..
ياعم مكنتش تنزل .. .. مكنتش تقولي .. متسبني عايش في فكرة أنها لسة عايشة ما أنت عارف أني حاولت أنساها من زمان وأني من يوم ما هي أتجوزت وأنا قولت خلاص خدت حكم براءة من شعلقتها في رقبتي العبيطة .. ليه ياعم كدة ..أنا ناقصك ما كفاية اللي حوليا.. يعني أيه يجلها سرطان ومعرفش .. يعني أيه تعرف وتخبي علي .. يعني أيه جوزها .. جوزها ميعرفهاش قدي محبهاش قدي ، هي متعرفوش زي ما كانت بتعرفي .. هي معشتش في أنفاسه في الهواء اللي بيلف حوليه الدنيا.. هي عاشت جوايا وعشت جواها .. بعدت عشان الشرف والناس والكلام والجواز .. حتى لو شفتها في شارع كنت بعدي من بعيد .. محولتش أسلم عليها لما قبلتها في يوم صدفة ولقتها مد أديها بالسلام .. كنت قولي يا جدع ما أنت ياما بتقول كلام فارغ ملوش لازمة قولي خلاص قربت تمشي .. خد بأيدها سلم عليها .. قولي أي حاجة يا عم الحاجة .. تسبني أتقتل ليه .. قولي تعبت .. متحملنيش ذنب عمري كله .. متحملنيش ذنب تختة واحدة شلتنا ، وكراسة واحدة جمعتنا .. متحملنيش ذنب سنين عشق ثانوي وإعدادي وابتدائي متحملنيش حلم الجواز والجامعة والخطوبة .. ليه يا عم مقولتليش ما أنت جارها وعارف أنك دايما بوصلة لي لما أحاول أتمحك فيك عشان تقولي كنت بتقول .. وكنت بتكسف منك أنت عارف ..صعب علي يا أخي أني أعترف أني عاشق متعودهاش يا كوتش .. ليه كدة يا أخي .. أحنا مش في فيلم عربي قديم وبايخ مش هروح لها المستشفي ولا هترمي في حضنها ، مش معقولة بعد ما بعدت السنين ده كلها هروح وأعمل فيها عماد حمدي .. خفت من أيه يا جدع جارها وصحبك معاك ورايحين تطمنوا عليها .. خفت من دموعي ما أنت عارف يا صحبي .. ما أنت عارف .. ليه كدة كان يجرى أيه يا عم الحاج لو ضحكت في وشها وأنا بسلم عليها يوميها .. أي حلم تاني هيجي في دنيا دلوقتي ..نسيت أيام مذكرتي ليك وليها نسيت مادة المحاسبة ، وكشاكيل الجامعة ، نسيت رحلتنا الطويلة وجرينا عشان نشوف شغل ، نسيت لما كنت أنا وانت نتشعلق فوق فوق الكوبري الجديد على القناة فرحنين بالشغل .. ونشوف الناس نمل تحتنا وتقولي لو وقعت دلوقتي تفتكر حد فينا ممكن يعيش ، ليه نسيت يا صحبي الجناين والخضرة وهي بتفرش الملاية وتحط لنا الأكل بعد ماتش كورة خايب بيني وبينك ، ليه نسيت جرينا وراء بعض أنا وهي على القناة ، ليه نسيت الحب اللي أتولد ومات عشان كل حاجة في حياتي حلوة لازمة تموت .. ليه ياعم نسيت .. أنا منستش .. ما أنت عارف كنت تيجي تقولي جابت محمد .. كنت بتيجي تقولي جابت دعاء .. ليه المرة ده مجتش تقولي جابت أي اسم واي حد .. ليه المرة دي جاي تقولي أنها ماتت .. ليه يا صحبي .. كنت أديني فرصة واحدة .. فرصة أقول لها معلش .. الدنيا كدة .. محدش بياخد غير نصيبه .. كنت أديني فرصة .. أقولها أزيك عاملة أيه .. ودول ولادك قطاقيط قوي وحلويين .. كنت أديني الفرصة ده يا صحبي .. أستخسرتها في ليه .. مش كدة .. مش كدة الدنيا معايا أنا .. ليه يا صحبي أنت كنت عارف .. عارف يعني أيه كنت عارف .. يعني تفتكر أني هعمل أيه دلوقتي .. هعيط دموعي هتكفي تفتكر .. تفتكر أني مشفهاش وهي ماشية وسايبة الدنيا ده سهلة .. تفتكر أنك لما ما قولتليش هي أستريحت أو أنا أستريحت .. ليه ياعم تعاقبني بالعقاب ده .. ما أنت عارف طبعي .. ليه .. ليه يا صحبي تحملني وزر ذنبين في يوم واحد .. ذنب أني مشفهاش وهي بتموت يبقى هي سابت ومشيت وأنت حكمت أني مقدرش أبص في وشك مرة تانية صعب أبص في وشك ومفتكرهاش ..هصرخ هزعق .. هعيط .. كل ده مش مشكلة قدام أني أخسرك دلوقتي وأنت عايش خسارة يا صحبي .. خسارة أني مش هقدر أسامحك أبدا .. خسارة وأنا بقولك النهاردة .. سلام .. سلام يا صحبي .. معدش ينفع أقولهالك تاني .. سلام يا صحبي .
This entry was posted
on 11:13 م
.
You can leave a response
and follow any responses to this entry through the
الاشتراك في:
تعليقات الرسالة (Atom)
.
أ/ محمد
قصة حزينة صادقة تحمل واقع زاخر بمشاعر إنسانية وألم دفينفي اسلوب بسيط سهل ممتنع يدخل القلب والفكر بإنسيابية عجيبة
تقبل مرورى الأول لمدونتك
وتحياتي
شكرا أختي الفاضلة سامية فريد
أسعدني للغاية مرورك وتعليقك
واسعدني وجودك في مدونتي
خالص تحياتي وشكري
وخالص التحايا
صعبة قوى القصة
لكن احييك على الاسلوب الرائع وترابط الفكرة
وكان الافكار تتداعى طليقة بلا قيود
دمت مبدعا
شكرا عزيزي
Dr.A.S. black armor
سعيد بمرورك وسعيد أن القصة عجبتك
خالص تحياتي لك
وخالص مودتي